اوك خلصت ثانوية!!!! وبعدين

ايون ايون خلصت امتحانات ورغم اني بقالي سنتين مستنية اليوم اللي اخد فيه الاجازة

بس حاسة بحاجه غريبة مش عارفة اتخيل حياتي خالص بعد كده مش قادرة اتخيل نفسي في جامعه وعندي محاضرات

لاني ببساطة لما بتعود على حاجة مش بعرف اغيرها 

ومش عارفه عايزة اعمل ايه تحديدا في حياتي 

بس عندي اهداف بس الاهداف ده بتحدد حسب الطريق اللي هختاره

وللاسف الطرق كتيرة جدا جدا جدا

لاني بحب اعمل حاجات كتير جدا وببقا مبسوطه في حاجات كتير

معظم الناس ياما بيبقا مش عندهم اي اهداف في حياتهم او عادة بيبقا عندهم كام طريق او كام حاجه مهتمين بيها المشكلة عندي اني فعلا بحب حاجات كتييير جدا

كان اول هدف في حياتي اني ادخل كلية علوم ده من وانا عندي تقريبا 11 سنه بس

بسبب الناس اللي دايما بتحبطني وبرغم ان الهدف لسه موجود وعايزة ادخل علوم 

بس مش متاكده اني هخرج اعمل حاجه

وده لان المجال اللي انا عايزة اختاره ميت في مصر

وانا مش عايزة اخاطر بمستقبلي وانا مش عارفة ايه اللي جاي

كنت بقول هسافر بره والاقي الناس بتقولي "هتسافري ازاي هو انتي فاكراها حاجه سهله كده" واقتنعت بكلامهم لانوا ببساطه هو ده اللي بيحصل 

لان في كمية ناس عندهم مواهب وقدرات ومصيرهم في الاخر ولا حاجة

طلعت في دماغي اني ابقا "مطورة العاب كمبيوتر" بس مش عارفه اي الكلية المناسبة 

بحب ارسم جدا 

عايزة ابقا مهندسة ديكور 

عايزة ابقا دكتورة بيطرية"مش دكتورة عادية من اللي مالييين البلد" و 

عايزة يبقا عندي فرقة موسيقية 

عايزة ابقا مترجمة كتب

وحاجات تانية بس مش فاكراها دلوقتي ^^

بس كل حاجه من دول ليها مشاكل وماعتقدش اني ممكن استحمل ان حاجة تقف في طريقي 

عني الاولى

برغم اني عملت تقريبا كام مدونة قبل كده بس الموضوع مش كان بيكمل بس اول محاولة كانت تقريبا ناجحة بس الواحد
كان جاله ملل من الكلام بس ساعات الواحد بيبقا محتاج انه يكتب حتى لو الكتابة مش بتعبر عن حاجة معينه
بس بتبقى رغبة عند الفرد

مش هعمل الموضوع رسمي واكتب بالعربية الفصحى الا لما فعلا ابقا عايزة كده وبرضه لاني مش مقتنعة اني عبقرية لغة عربية

حاولت في مدونتي القديمة اني اتبع اسلوب الناس اللي حواليا
بس النتيجه اني زهقت لاني ماكنتش فعلا حاسة اني بعمل حاجه بحبها

حاولت اكتب عن موضوعات اكبر من سني بكتير وكنت مش بكتب من عقلي ولا حتى قلبى كان الكلام بيجي بالحظ

وبرغم كده اسلوبي كان طفولي

مدونتي عملتها وانا تقريبا تقريبا يعني 13 سنه او يمكن اقل او اكتر
مش هقدر افتكر بالتحديد

استمر الموضوع لمدة سنة ونص تقريبا وبعدين ظهرت حالة الجمود "-_-" اللي ممكن تبقا طبيعية عند معظم المدونين

وبعدين قررت اني اقفلها خالص وفتحت مدونه تانيه تقريبا عملت فيها بوستايه واحدة بس وقفلتها برده

المدونه ده هتبقا حاجه مختلفة تماما انا فعلا مش عملاها الا عشان اعبر عن اللي الحاجات اللي بتنطط في "ذهني" او مجرد اكتب عن
نفسي

ممكن اعتبرها ذي مذكرات

-------------

مدونتي الاولي كان اسمها :البداية من هنا

اسم مش عاجبني ومش فاكرة انا اخترته ليه

كان "يطلق" عليا : وشوشني

برغم ان اسمي مريم

وبرده مش مهم ايه سبب التسمية الغريبة ده

اوك باي ^^